Ein cynllun hirdymor, lefel uchel ar gyfer gwella iechyd a lles y poblogaethau rydym yn eu gwasanaethu, a gwella’r gwasanaethau a ddarparwn i bobl dros y degawd nesaf.
Rydym yn gwahodd aelodau’r cyhoedd, cydweithwyr a rhanddeiliaid i roi adborth ar ein strategaeth.
Mae sawl ffordd o ymgysylltu yn dibynnu ar yr amser sydd ar gael i chi:
Os oes gennych ddeng munud darllenwch grynodeb o’n strategaeth a rhowch eich safbwyntiau i ni.
Os oes gennych bum munud ar hugain darllenwch ein strategaeth lawn a rhowch adborth manwl.
Os oes gennych awr neu fwy, y ffordd orau o glywed mwy am y strategaeth a rhoi adborth yw dod draw i un o’r digwyddiadau sy’n cael eu cynnal ar draws Caerdydd, Bro Morgannwg ac ar-lein. Mae’r digwyddiadau hyn yn gyfle i glywed y cyd-destun, gofyn cwestiynau a rhoi eich safbwyntiau i aelodau o’n tîm Gweithredol a’n Bwrdd.
Gan fyfyrio ar bopeth yr ydym wedi’i ddysgu drwy’r pandemig, mae ‘Llunio ein Llesiant i’r Dyfodol 2023 – 2033’ yn nodi ein huchelgais i adnewyddu ein ffocws ar fynd i’r afael â’r anghydraddoldebau iechyd dwfn sy’n bodoli o fewn ein cymunedau a rhyngddynt, gan alluogi pobl i gadw’n iach, a darparu gwasanaethau rhagorol i’r rhai sydd eu hangen, pan fydd eu hangen arnynt.
Er mwyn llunio’r strategaeth hon, fe wnaethom wrando ar bobl sy’n defnyddio ein gwasanaethau, ein cymunedau lleol, ein timau a’n partneriaid ac rydym yn ddiolchgar iawn i bawb a wnaeth roi o’u hamser i ddweud wrthym beth sy’n bwysig iddynt.
Rydym wedi adolygu’r adborth a nawr rydym yn gofyn i chi rannu eich safbwyntiau ar ein strategaeth arfaethedig unwaith eto.
